
第一世噶玛巴教言集1KM28རྟ་མགྲིན་གྱི་རིག་གཏད་བཞུགས་སོ། །
1-2-180b
༄༅། །རྟ་མགྲིན་གྱི་རིག་གཏད་བཞུགས་སོ། །
༄༅། །རྟ་མགྲིན་གྱི་རིག་གཏད་བཞུགས་སོ། །བླ་མ་རྡོ་རྗེ་འཆང་དང་ནི། གདུག་པ་འདུལ་མཛད་རྟ་མཆོག་དཔལ། །དབང་ཆེན་ཁྲོ་བོ་དེ་ལ་འདུད། །གང་མཐོང་སྡུག་བསྔལ་གྱུར་པ་ལ། །སྨིན་པས་དངོས་གྲུབ་ཐོབ་བྱའི་ཕྱིར། །རྟ་མཆོག་རྒྱུད་དང་བླ་མའི་གསུང་། །དེ་ཡི་རིག་གཏད་ཆོ་ག་བྲི། །གང་ཞིག་དབང་ཐོབ་དམ་ཚིག་ལྡན། །བཟོད་ལྡན་བརྟན་ཞིང་བློ་གྲོས་ཆེ། །དཔའ་བརྩོན་དྲང་ལ་གཡོ་སྒྱུ་མེད། །སྔགས་དང་རྒྱུད་ཀྱི་སྦྱོར་བ་ཤེས། །དེ་ཉིད་བཅུ་ཤེས་ཆོ་ག་མཁས། །བླ་མ་མཚན་ཉིད་ལྡན་པ་ལ། །སློབ་མ་སྐལ་ལྡན་གསོལ་བཏབ་པས། །དེ་ཡི་རྗེས་སུ་བཟུང་བར་བྱ། །ཞེས་རྟ་མགྲིན་གྱི་རིག་གཏད་ཞུ་བར་འདོད་པའི་
1-2-181a
༄༅། །སློབ་མས། ཞུ་བ་ལན་གསུམ་གྱི་བར་དུ་གསོལ་བ་བཏབ་པའི། བླ་མས་གནང་བ་བྱིན་ལ། དགོས་པའི་རྫས་རྣམས་བསོག་ཏུ་གཞུག་གོ །དུས་ཚོད་གཟའ་སྐར་བཟང་པོ་ལ་གནས་ནས་དབེན་པ་ཉམས་དགའ་བ་ཆག་ཆག་དང་། ལོགས་རྒྱན་དང་། གནས་རྒྱན་ལ་སོགས་པས་མཛེས་པར་བྱས་ལ། ས་གཞི་དེ་མཎྜལ་འདོམ་གང་པ་གཅིག་ལ་རྣམ་ལྔ་དང་དྲི་བཟང་གིས་བྱུགས། ཐིག་ཆེན་བཅུ་དྲུག་བཏབ་ལ༑ རེ་ཁ་དཀར་པོ་འདབ་བརྒྱད་བྲི། དེའི་དབུས་སུ་མ་འཇིའི་ཁར་བུམ་པའི་རྫས་གཞན་དང་འཐུན་པར་བླུག་པ་དང་། མགུལ་ཆིངས་དང་ཁ་རྒྱན་ལ་སོགས་པ་དང་ལྡན་པར་བཞག་གོ །ལས་བུམ་བྱང་ཤར་དུ་བཞག་གོ །དེའི་མཐའ་མ་མཆོད་པ་རྣམ་ལྔས་བསྐོར། གཏོར་མ་ལྔ་བཤམ། དེ་ནས་སློབ་དཔོན་བསྒྲུབ་གཡོག་དང་བཅས་པ་ཁྲུས་བྱ། སྟན་བདེ་བ་ལ་འདུག །ཡི་གེ་བརྒྱ་པས་རྒྱུད་སྦྱོང་། བགེགས་ལ་གཏོར་མ་བྱིན༑ བདེན་པ་བདར། བསྲུང་འཁོར་བསྒོམ། རྟེན་གྱི་མདུན་དུ་གསོ་སྦྱོང་བླང་། དཀོན་མཆོག་མཆོད་པ་འབུལ། དེ་ནས་བདག་ཉིད་སྒྲུབ་ཐབས་ནས་འབྱུང་བ་བཞིན་བསྐྱེད། རྟ་མགྲིན་གྱི་སྙིང་པོ་ཅི་རིགས་པ་བཟླས༑ དེ་ནས་སྭ་བྷཱ་ཝའི་སྔགས་ཀྱིས་མཎྜལ་དང་བུམ་པ་མི་དམིགས་པ་ལས་དཀྱིལ་འཁོར་སྒྲུབ་ཐབས་ནས་འབྱུང་བ་བཞིན་དུ་རྟ་མགྲིན་ལྷ་ལྔ་བསྐྱེད་དེ། ཡེ་ཤེས་པ་བསྟིམ། སྐུ་གསུང་ཐུགས་བྱིན་གྱིས་
1-2-181b
བརླབས༑ དབང་བསྐུར་བ་ནི། གཙོ་བོ་ལ་སྣང་བ་མཐའ་ཡས། འཁོར་ལ་རིགས་བདག་བསྒོམ། ཡང་གཙོ་བོ་ལ་སྣང་བ་མཐའ་ཡས། ཤར་དུ་མི་བསྐྱོད་པ། ལྷོར་རིན་འབྱུང་། ནུབ་ཏུ་རྣམ་སྣང་། བྱང་དུ་དོན་ཡོད་གྲུབ་པ། པད་འདབ་བཞི་ལ་བསྐྱེད། ཤྭ་ན་མ་བཞི་སྒོ་བཞི་ལ་བསྐྱེད། ཡེ་ཤེས་པ་བསྟིམ། ཀ་བ་ཙི་བརླབས། དབང་བསྐུར། རིགས་བདག་གིས་རྒྱས་གདབ། མཆོད་པ་འབུལ། བསྟོད་པ་བྱ། བཟླས་པ་ཅི་རིགས་པ་བྱ། ཐོན་ནས་ཡང་མཆོད་པ་འབུལ། སློབ་མའི་རྒྱུད་སྨིན་པར་གསོལ་བ་གདབ། དེ་ནས་བུམ་པ་མི་དམིགས་པའི་ངང་ལས། བགེགས་བསལ། སྭ་བྷཱ་ཝས་སྟོང་པར་བསམ། སྟོང་པའི་ངང་ལས་ཕྱི་བུམ་པ། ནང་གཞལ་ཡས་ཁང་། དེའི་དབུས་སུ་བཾ་ལས་འོ་མའི་རྒྱ་མཚོ། དེའི་སྟེང་དུ་པད་ཉིའི་གདན་ལ་དཔལ་རྟ་མགྲིན་ལྷ་ལྔ་སྒྲུབ་ཐབས་ནས་འབྱུང་པ་བཞིན་བསྐྱེད། ཡེ་ཤེས་པ་བསྐྱེད། ཀ་བ་ཙི་དབང་བསྐུར༑ པཱུ་ཙ་འབུལ། བསྟོད་པ་བྱ། དེའི་ཁ་རྒྱན་གྱི་གསེབ་ཏུ་ཏིང་གི་ནང་དུ་དྲི་བཟང་གི་ཆུའི་སྟེང་དུ་རྡོ་རྗེ་གཟུང་ཐག་ལ་བཏགས་ཏེ་བདག་གིས་བཟུང་ལ། རྩ་སྔགས་བཟླས་པས་བདག་གི་ཐུགས་ཀ་ནས་འོད་ཟེར་འཕྲོས་པས་གཟུང་ཐག་ལ་འཁྲིལ་ནས་སོང་པས། བུམ་པའི་ལྷའི་ཐུགས་ཀར་ཕོག་པས་མཉེས་པའི་མཆོད་པ་ཕུལ་ནས། ལྷའི་བ་སྤུའི་བུ་ག་ཐམས་ཅད་བདུད་རྩིའི་རྒྱུན་དམར་ཕྲ་ལ་ལ་འཛགས་པས་
1-2-182a
༄༅། །བུམ་པ་ཡེ་ཤེས་ཀྱི་བདུད་རྩིས་གང་བར་བསམ་ཞིང་བཟླས་པ་བྱ། མཐར་མཆོད་པ་འབུལ། བསྟོད་པ་བྱ། གསོལ་བ་བཏབ་པས་བདུད་རྩིས་དམར་ལྡེམ་ལྡེམ་གང་བར་བསམ། དེ་ནི་དཀྱིལ་འཁོར་བསྒྲུབ་པའོ། །དེ་ནས་གཏོར་མ་བསྔོ། སྨོན་ལམ་གདབ་པོ། །དེ་ནས་སློབ་མ་འཇུག་པ་ནི། སློབ་མ་རྣམས་འོངས་མས་ཁྲུས་བྱས། གུ་གུལ་གྱི་དུད་པས་བདུག ཁྲོ་བོའི་ང་རྒྱལ་གྱིས་བགེགས་བསྐྲད། གྲལ་ལ་རིམ་གྱིས་འཁོད། དེ་ནས་གདམས་ངག་ནི། འོ་འཁོར་བ་ལ་སྙིང་པོ་མེད་པས་སྙིང་པོ་ལེན་དགོས། དེ་ལ་སངས་རྒྱས་ཀྱི་བསྟན་པའི་སྒོར་ཞུགས་ནས་འཁོར་བ་འདི་མེའི་ཕུང་པོ་དང་འདྲ་བ་ཡིན་པས། དེ་ལ་ཡིད་འབྱུང་བར་བྱས་ལ། རྫོགས་པའི་སངས་རྒྱས་ཐོབ་པར་བྱ། དེའི་དོན་དུ་སངས་རྒྱས་ཐམས་ཅད་ཀྱི་ཕྲིན་ལས་འབྱུང་པ་དཔལ་རྟ་མགྲིན་གྱི་དཀྱིལ་འཁོར་དུ་གཞུག་དགོས་སྙམ་དུ་སོམས་ཅིག །ཅེས་བརྗོད་དོ། །དེ་ནས་གསོ་སྦྱོང་བླང་། དེ་ནས་ཕ་རོལ་ཏུ་ཕྱིན་པའི་སྐྱབས་འགྲོ་དང་སེམས་བསྐྱེད་བསླབ་བྱ་དང་བཅས་པ་འབོགས། དེ་ནས་མེ་ཏོག་དང་མཎྜལ་ཕུལ། གསོལ་བ་གདབ་པ་ནི། དགའ་ཆེན་ཁྱོད་བདག་སྟོན་པ་བས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོར་བདག་ཕྱག་འཚལ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་
1-2-182b
སྩོལ༑ ༑སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་འཇུག་པར་འཚལ། །ཞེས་ལན་གསུམ་བརྗོད་དོ། །དེ་ནས་བུར་བྱིན་གྱིས་བརླབས་པ་ནི། བུ་ཚུར་ཐེག་པ་ཆེན་པོ་ཡི། །ཁྱོད་ནི་ཚུལ་ཆེན་སྣོད་ཡིན་གྱིས། །གསང་སྔགས་སྤྱོད་ཚུལ་ཆོ་ག་འདི། །ཁྱོད་ལ་ཡང་དག་བསྟན་པར་བྱ། །རྫོགས་པའི་སངས་རྒྱས་གང་འདས་དང་༑ ༑གང་དག་དེ་བཞིན་མ་བྱོན་པ། །ད་ལྟར་བྱུང་པའི་རྫོགས་སངས་རྒྱས། །འགྲོ་ལ་ཕན་ཕྱིར་བཞུགས་པ་རྣམས། །དེ་དག་གིས་ནི་གསང་སྔགས་ཀྱི། །ཆོ་ག་བཟང་པོ་འདི་མཁྱེན་ནས། །དཔའ་བོ་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་མཉམ་མེད་པ། །སྐྱོབ་པ་སངས་རྒྱས་ཧེ་རུ་ཀས། །བདུད་སྡེ་ཤིན་ཏུ་མི་ཟད་པ། །དཔུང་ཆེན་དག་ཀྱང་དེ་ཡིས་བཅོམ། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡི་བློ་གྲོས་འདི་གྱིས་ཤིག་ཅེས་བརྗོད་དོ། །དེ་ནས་བདུན་རྣམ་དག་གུར་ནས་འབྱུང་བ་བཞིན་བརྗོད་པ་ནི། དེ་ནས། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་མི་དགེ་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་བཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་བདག་སྐྱབས་མཆི། །རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་
1-2-183a
༄༅། །བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གི་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །དེ་ནས་རིགས་ལྔའི་སྡོམ་པ་ནི། ཇི་ལྟར་དུས་གསུམ་མགོན་པོ་རྣམས། །བྱང་ཆུབ་དུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །སངས་རྒྱས་རྣལ་འབྱོར་སྡོམ་པ་ལ། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་བསྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་བརྟན་པོར་བཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །སངས་རྒྱས་རྣལ་འབྱོར་ལས་སྐྱེས་པའི། །སྡོམ་པ་དེང་ནས་བཟུང་བར་བགྱི། །ནམ་དུ་ཡང་ནི་མི་སྤང་ངོ་། །རྡོ་རྗེའི་རིགས་མཆོག་ཆེན་པོ་ལ། །རྡོ་རྗེ་དྲིལ་བུ་ཕྱག་རྒྱ་ཡང་། །ཡང་དག་ཉིད་དུ་བཟུང་བར་བགྱི། །སློབ་དཔོན་དག་ཀྱང་བཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པད་མའི་རིགས་མཆོག་དག་པ་ལ། །ཕྱི་དང་གསང་བ་ཐེག་པ་གསུམ། །དམ་པའི་ཆོས་ཀྱང་བཟུང་བར་བགྱི། །ལས་ཀྱི་རིགས་མཆོག་ཆེན་པོ་ལ། །སྡོམ་
1-2-183b
པ་ཐམས་ཅད་ལྡན་པར་ནི། །ཡང་དག་ཉིད་དུ་བཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར༑ ༑བདག་གིས་སྡོམ་པ་མ་ལུས་བཟུང་། །མ་སྒྲལ་བ་རྣམས་བདག་གིས་བསྒྲལ། །མ་གྲོལ་བ་རྣམས་དགྲོལ་བར་བགྱི། །དབུགས་མ་བྱུང་རྣམས་དབུགས་དབྱུང་ཞིང་། །སེམས་ཅན་མྱ་ངན་འདས་ལ་འགོད༑ ༑ཅེས་ལན་གསུམ་བརྗོད་དོ། །དེ་ལྟར་ལྷར་བསྐྱེད་ནས་སྐུ་གསུང་ཐུགས་བྱིན་གྱིས་བརླབས། མཆོད་པ་འབུལ། སྐུད་པ་དམར་པོ་ལ་མདུད་པ་གསུམ་བྱས་ལ། མདུད་པ་རེ་རེ་ལ་ལྷ་བསྐྱེད་ལ་སྔགས་ཉི་ཤུ་རྩ་གཅིག་བཟླས་པ་དཔུང་པ་གཡོན་པ་ལ་བཅིང་ངོ་། །དེ་ནས་མཎྜལ་དང་འཇུག་ཡོན་ཕུལ་ལ་གསོལ་བ་གདབ་པ་ནི། རིགས་ཀྱི་པད་མའི་ནང་བཞུགས་པའི། །འཇིག་རྟེན་དབང་ཕྱུག་རྟ་མགྲིན་དཔལ། །བདེ་གཤེགས་གསུང་གི་སྤྲུལ་པ་སྟེ། །ཁྲོ་རྒྱལ་ཁྱོད་ལ་སྐྱབས་སུ་མཆི། །བྱང་ཆུབ་རྡོ་རྗེ་སངས་རྒྱས་ལ། །ཇི་ལྟར་མཆོད་ཅིང་རྩལ་བ་ལྟར། །བདག་ཀྱང་སྐྱོབ་པའི་དོན་གྱི་ཕྱིར། །ནམ་མཁའི་རྡོ་རྗེ་བདག་ལ་གསོལ༑ ༑ཅེས་གསོལ་བ་གདབ། དེ་ནས་བུམ་པའི་ཆུས་སྤྱི་བོ་ནས་དབང་བསྐུར་ཞིང་། ངག་ཏུ། ཇི་ལྟར་བལྟམས་པ་ཙམ་གྱིས་ནི། །ལ་སོགས་པ་དང་། སངས་རྒྱས་རྣམས་ནི་ཐམས་ཅད་ཀྱི། །གསང་གསུམ་
1-2-184a
༄༅། །གནས་ལས་བྱུང་པ་ཡི། །ཁམས་གསུམ་ཀུན་གྱིས་ཕྱག་བྱས་པའི། །རྡོ་རྗེ་དབང་བསྐུར་ཆེན་པོ་སྦྱིན། །ཞེས་བརྗོད་ཅིང་དབང་བསྐུར་རོ། །དེ་ནས་སྡིག་པ་དག་ནས་དཔལ་རྟ་མགྲིན་དུ་གྱུར་པར་བསམ་མོ། །ཆུ་ཡར་ལུད་པ་ལས་སྣང་བ་མཐའ་ཡས་ཀྱིས་དབུ་རྒྱན་པར་བསྒོམ། དེས་ལུས་ཀྱི་སྡིག་པ་དག་ནས། ལྷ་བསྒོམ་པའི་ལུང་ཐོབ། དེ་ནས་མཎྜལ་ཕུལ་ལ་གསོལ་བ་གདབ་སྟེ། གསུང་གི་བདག་པོ་གཙོ་བོ་ཆེ། །སངས་རྒྱས་གསུང་གི་དབང་ཕྱུག་གཙོ། །འདོད་ཆགས་ལ་སོགས་དུག་གསུམ་འཇོམས། །འགྲོ་བའི་གཙོ་ལ་སྐྱབས་སུ་མཆི། །ཞེས་ལན་གསུམ་གསོལ་བ་གདབ། དེ་ནས་དཔོན་སློབ་ལྷར་གསལ་བའི་ཐུགས་ཀ་ནས་སྔགས་ཀྱི་ཕྲེང་བ་དམར་པོ་ན་ར་ར་བྱུང་ནས་སློབ་མའི་ཐུགས་ཀར་ཐིམ་པར་བསམ་ལ༑ སྔགས་ཀྱི་རྗེས་བཟློས་ལན་གསུམ་བྱས་པས་སངས་རྒྱས་ཐམས་ཅད་ཀྱི་གསུང་གི་བྱིན་རླབས་བདག་ལ་འདུས་པར་བསམ་མོ། །དེ་ནས་མེ་ཏོག་དམར་པོའི་ཕྲེང་བ་མགོར་བཞག་ལ། ངག་ཏུ། བཅོམ་ལྡན་འདས་ཀྱི་བྱིན་རླབས་ནི། །འདི་ལ་འགོ་བར་མཛད་དུ་གསོལ། །སྔགས་ཀྱི་དངོས་གྲུབ་སྩལ་དུ་གསོལ། །ཕྲིན་ལས་རྫོགས་པར་མཛད་དུ་གསོལ། །ཅེས་བརྗོད་དོ། །དེ་ནས་སློབ་མས་བཅོམ་ལྡན་བདག་ལ་སྩལ་ལགས་ཀྱིས། །བཅོམ་ལྡན་བདག་ལ་བྱིན་གྱིས་རླབས། ཅེས་བརྗོད་དོ། །དེས་ནི་ངག་གི་སྡིག་སྒྲིབ་དག་
1-2-184b
ནས༑ གསུང་གི་དངོས་གྲུབ་ཐོབ། ངག་སྔགས་བཟླས་བརྗོད་བྱེད་པ་ལ་དབང་ངོ་། །དེ་ནས་སློབ་མ་ལྷར་གསལ་བ་ལ་ཕྱག་གཡས་སུ་རྡོ་རྗེ་རྩེ་ལྔ་པ། གཡོན་དུ་པད་ཞགས་གཏད་ལ་ཐབས་རྡོ་རྗེ། ཤེས་རབ་པད་ཞགས་གཏད་པས། ཐབས་ཤེས་གཉིས་མེད་ཀྱི་ཕྲིན་ལས་རྣམ་བཞི་བསྒྲུབ་པ་ལ་དབང་བ་ཡིན་ནོ། །ཞེས་བརྗོད་དོ། །དེ་ནས་དཀྱིལ་འཁོར་ལ་བཏང་རག་གི་མཆོད་པ་འབུལ། བསྟོད་པ་བྱ། ཡེ་ཤེས་པ་གཤེགས༑ དམ་ཚིག་པ་བསྡུ་སློབ་དཔོན་ལ་ཡོན་འབུལ། དགེ་བ་བསྔོ། ཟབ་མོའི་རིག་གཏད་ཆོ་ག་འདི། །རྫོགས་སངས་རྒྱས་ཀྱིས་གསུངས་པས་ན། །གཞན་གྱིས་རང་བཟོ་མི་བྱ་ཞིང་། །འདི་བཞིན་བྱས་ན་ལམ་གྱི་མཆོག །ལུང་མེད་བྱས་ན་བཀའ་ཆད་འོང་། །ཤེས་འདོད་ལག་ལེན་འདི་བཞིན་མཛོད། །རྡོ་རྗེ་འཆང་གི་ལམ་མཆོག་ཡིན། །འགྲོ་རྣམས་ལམ་མཆོག་འདིར་ཞུགས་ཏེ། །རྡོ་རྗེ་འཆང་གི་ས་ཐོབ་ཤོག དཔལ་རྟ་མགྲིན་ལྷ་ལྔའི་རིག་པ་གཏད་པའི་ཆོ་ག་རྫོགས་སོ།། །།


目录
རྟ་མགྲིན་གྱི་རིག་གཏད་བཞུགས་སོ། །